लकडाउनलाई मध्येनजर गर्दै नेपाल टेलिकमको नयाँ योजना : रिचार्ज बराबरकै बोनस दिन सुरु
काठमाडौं, १२ चैत । कोरोना (कोभिड–१९) भाइरस संक्रमण फैलन नदिन सरकारले सिङ्गो देश लकडाउन गरेको छ । बाहिर बजार पसल बन्द छ, बाहिर निस्कन मनाही छ । यस्तो अप्ठ्यारो अवस्थालाई मध्यनजर गर्दै नेपाल टेलिकमले आफ्ना ग्राहकलाई रिचार्ज बराबरको बोनस रकम दिन थालेको छ । बुधबार राति १२ बजेदेखि उक्त बोनस शुरु हुने टेलिकमले जनाएको छ ।
आज (बुधबार) राति १२ बजेदेखि लागू हुने गरी रिचार्ज बराबरका बोनस दिन शुरु गरिने टेलिकम प्रबन्धनिर्देशक डिल्ली अधिकारीले जानकारी दिएका छन् । यो बोनस सरकारले तोकेको ७ दिने लकडाउन अवधिको लागि मात्र हुनेछ ।
‘अहिलेको लागि हामीले ७ दिनको लागि मात्र दिने निर्णय गरेका छौं’, अधिकारीले भने, ‘आवश्यक परेमा पछि थप हुनेछ ।’
मंगलबार नियामक निकाय नेपाल दूरसञ्चार प्राधिकरणले दूरसञ्चार सेवा प्रदायक कम्पनीहरुलाई ग्राहकले रिचार्ज गरे बराबरको बोनस र ऋणका रुपमा दिइने सापटीलाई २ सय रुपैयाँसम्म पुर्याउन निर्देशन दिएको थियो ।
हालको लागि रिचार्ज बराबरको बोनसमा मात्र दिने टेलिकमले जनाएको छ । लोनमा ग्राहकको रुची नदेखाएकाले बोनस मात्र दिने निष्कर्ष निकालिएको टेलिकमले जनाएको छ ।
रिचार्ज बराबरको बोनसमा प्राप्त रकमलाई लकडाउन अवधिभरमा सक्नुपर्नेछ । अन्यथा प्राप्त बोनस काटिने जनाइएको छ ।
