सामान्य थकान र शरीर दुखाइको समस्यापछि भारतीय गृहमन्त्री शाह अस्पताल भर्ना

नयाँ दिल्ली, २ भदौ  ः भारत सरकारका संघीय गृहमन्त्री अमित शाहको स्वास्थ्यमा सामान्य समस्या आएपछि उपचारका लागि सोमबार राति अस्पताल भर्ना हुनुभएको छ ।

राजधानी नयाँ दिल्लीस्थित अखिल भारतीय मेडिकल साइन्सेज (एम्स) मा उहाँ भर्ना भएको एम्स अस्पतालले मङ्गलबार पुष्टि गरेको छ । शाहलाई अस्पतालको कार्डियोथोरासिक र न्युरोसेन्स सेन्टर (सीएनसी) को भीआईपी वार्डमा भर्ना गरिएको छ ।

अस्पतालद्वारा दिइएको जानकारीमा भनिएको छ, “गृहमन्त्री अमित शाहले आफूलाई विगत तीन चार दिनदेखि थकान र शरीर दुखाइको अनुभव भएपछि अस्पताल भर्ना हुनुभएको हो । उहाँको स्वास्थ्य अवस्था सामान्य रहेकोे र अस्पतालबाट नै आफ्नो जिम्मेवारी बहन गरिरहनुभएको छ ।”

मन्त्री शाहलाई १४ अगस्टमा दिल्लीको गुरुग्रामस्थित मेदान्त अस्पतालबाट डिस्चार्ज गरिएको थियो । डिस्चार्जपछि उहाँले एक ट्वीटर सन्देश लेख्दै उपचारमा सम्लग्न चिकित्सकलाई धन्यवाद दिनुभएको थियो । “मेरो कोभिड–१९ परीक्षण रिपोर्टले सङ्क्रमणमुक्त भएको पुष्टि गरेको छ । म भगवान्लाई धन्यवाद दिन्छु साथै मेरो राम्रो स्वास्थ्यको कामना गर्ने सबैप्रति हार्दिक आभार व्यक्त गर्दछु । डाक्टरको सल्लाहमा म केही दिन घरमा नै एक्लै बस्नेछु ।

अगस्ट २ मा कोभिड–१९ सङ्क्रमण पुष्टि भएपछि गृहमन्त्री शाहले ट्विटरमार्फत् आफ्नो स्थिति घोषणा गर्दै पछिल्ला दिनमा आफूसँग सम्पर्कमा आएका व्यक्तिलाई पनि एक्लो रहन र परीक्षण गर्न आग्रह गर्नुभएको थियो । सिन्ह्वा