बैतडीमा पिसीआर प्रयोगशाला सञ्चालन


प्रदेश सरकारको सहयोगमा जिल्ला अस्पतालमा स्थापना गरिएको कोरोना परीक्षण पिसीआर प्रयोगशालाको आज उद्घाटन गरिएको छ । उक्त प्रयोगशालाको प्रदेशका सामाजिक विकासमन्त्री कृष्णराज सुवेदी र उद्योग, पर्यटन, वन तथा वातावरणमन्त्री माया भट्टले उद्घाटन गर्नुभएको हो ।

मन्त्री सुवेदीले प्रदेश सरकार कोरोना नियन्त्रण गर्न जिम्मेवार भएर लागेको बताउनुभयो । उहाँले भन्नुभयो, “कोरोना रोकथाम तथा नियन्त्रणका लागि सरकार जिम्मेवार भएर लागेको छ, सबैले आ–आफ्नो क्षेत्रबाट सहयोग गर्न जरुरी छ ।” यसका साथै उहाँले कोरोना संक्रमितलाई हेला नगर्न आग्रह गर्नुभएको छ ।

यस्तै मन्त्री भट्टले प्रदेश सरकारले जनताको आकांक्षाअनुसार काम गरिरहेको जिकिर गर्नुभयो । उहाँले भन्नुभयो “जनताकै हितका लागि सदैब प्रदेश सरकार लागिपरेको छ, जनताकै इच्छाअनुसार नै काम गरिरहेका छौं ।”

प्रदेश सरकारको करिब रु ४० लाखको लागतमा प्रयोगशाला स्थापना गरिएकोे अस्पताल व्यवस्थापन समितिकी अध्यक्ष पार्वती भट्टले बताउनुभयो । प्रयोगशाला उद्घाटनपछि अब जिल्लामै कोरोनाको परीक्षण पनि शुरु भएको छ । यसअघि कोरोना परीक्षणका लागि डडेल्धुरा र कैलाली स्वाब पठाउनुपर्ने अवस्था रहेकामा अब जिल्लामा कोरोना परीक्षण हुने जिल्ला अस्पतालका प्रमुख डा डम्वरजंग सिंहले जानकारी दिनुभयो । रासस

प्रतिक्रिया दिनुहोस