दुहवी ग्रिडमा पानी, सात जिल्लाको विद्युत् सेवा अवरुद्ध

लगातार तीन दिनदेखि अविरल वर्षासँगै आएको बाढीका कारण नेपाल विद्युत् प्राधिकरण दुहवी ग्रिडमा पाँच फिटसम्म पानी जमेको छ । विद्युत् ग्रिडमा पानी जमेका कारण आज बिहानैदेखि सात जिल्लाको विद्युत् सेवा अवरुद्ध भएको छ । दुहवी ग्रिड भएर प्रवाह भएको विद्युत् बिहीबारसम्ममा मात्र सञ्चालन हुने प्राधिकरण दुहवी वितरण शाखा प्रमुख रामउदगार साहले जानकारी दिनुभयो । पानी जमेकाले विद्युत् आउने सम्भावना तत्काल कम रहेको र बिहीबारसम्ममा आउने उहाँले जानकारी दिनुभयो ।

ग्रीडमा पानी पसेका कारणले विद्युत् अवरुद्ध भएको र पानी पस्नेक्रम जारी रहेकाले विद्युत् सञ्चालनमा समस्या भएको दुहबीमा रहेको प्राधिकरण दुहबी ग्रीडका प्रमुख राजेश रेग्मीले जानकारी दिनुभयो । बास्ता र टेग्रा खोलाको पानी पसेकाले सुनसरी, मोरङ, धनकुटा, भोजपुर, सङ्खुवासभा, खोटाङ र झापासहितका क्षेत्रमा विद्युत् अवरुद्ध भएको रेग्मीले जानकारी दिनुभयो । दुहबीको १३२ केभी प्रसारण लाइन नै डुबानमा परेकाले विद्युत् पूर्ण अवरुद्ध भएको उहाँले जानकारी दिनुभयो ।

त्यसैगरी अविरल वर्षासँगै सुनसरी खोलामा आएको बाढीका कारण सुनसरीको भोक्राहा नरसिंह गाउँपालिका–४ मा निर्माणाधीन अवस्थामा रहेको ४०० केभी र २२०/१३२/३३ केभी इनरुवा सवस्टेसन डुबानमा परेको छ । सुनसरी खोला नै सवस्टेसनमा पस्दा ठूलो क्षति पुगेको छ । आगामी पुसभित्र (डिसेम्बर २०२१) निर्माण सम्पन्न गरी सञ्चालन गर्ने (चार्ज) लक्ष्यका साथ दुवै सवस्टेसनको काम भइरहेको थियो । बाढीले सवस्टेसनको कम्पाउण्डवाल बगाएको प्रहरीले जनाएको छ ।

यो पनि – सुदूरपश्चिमलाई बाढी–पहिरो सङ्कटग्रस्त क्षेत्र घोषणा गर्न माग

गृहमन्त्री बालकृष्ण खाँणलाई संस्कृति, पर्यटन तथा नागरिक उड्डयनमन्त्री प्रेमबहादुर आले नेतृत्वको टोलीले आज भेट गरी सुदूरपश्चिम प्रदेशमा चार दिनदेखिको बाढी पहिराले मानवीय तथा धनजनको ठूलो क्षति गरेकाले उक्त क्षेत्रलाई सङ्कटग्रस्त क्षेत्र घोषणा गर्न माग गरेको छ । सुदूरपश्चिम प्रदेशका मन्त्री दीर्घ सोडारी, सांसद शेरबहादुर कुवँर, पूर्वसांसद हर्कबहादुर सिंह, पूर्वीचौकी गाउँपालिकाका अध्यक्ष दीर्घराज बोगटी तथा नागरिक समाजका प्रतिनिधि सूर्य श्रेष्ठ, रमण श्रेष्ठ, वीरेन्द्र भण्डारी, धनबहादुर ओलीलगायतले भेट गरी सुदूरपश्चिम प्रदेशमा बाढी–पहिराले ठूलो क्षति गरेका कारण राहत तथा उद्धारका लागि तत्कालै राज्यका सबै निकायलाई परिचालन गर्न माग गर्नुभएको हो ।

यसैगरी उक्त टोलीले बाढी–पहिराले सुदूरपश्चिमका कैलाली, कञ्चनपुर, बझाङ, अछाम, बाजुरा, बैतडी तथा डोटीमा अहिले पनि नागरिक अलपत्र परेका तथा कतिपयका घरबारविहीन भएर बास बस्नका लागि पनि समस्यामा परेकाले स्थलमार्गबाट उद्धार हुन नसकेकाले हवाई मार्गबाट जतिसक्दो चाँडो उद्धारका लागि पहल गर्न माग गरेका छन् । सुदूरपश्चिमका नौ जिल्लामध्ये सबैभन्दा बढी मानवीय क्षति बझाङ र डोटीमा भएको उक्त टोलीका प्रमुख तथा संस्कृति, पर्यटन तथा नागरिक उड्डयनमन्त्री आलेले गृहमन्त्री खाँणसमक्ष जानकारी दिनुभएको थियो । मन्त्री आलेले सुदूरपश्चिम बाढी–पहिराका कारण अहिले आहालमा डुबेकाले तत्कालै राज्यले आफ्नो उपस्थिति देखाउनुपर्ने माग राख्नुभएको थियो ।

यसैगरी अछामबाट निर्वाचित सांसद शेरबहादुर कुँवरले सुदूरपश्चिमका पीडित नागरिकको आलो घाउमा मल्हम लगाउनलाई भए पनि राज्यले तत्काल उद्धार तथा राहतको व्यवस्था गर्नुपर्ने माग राख्नुभएको थियो । गृहमन्त्री खाँणले सुदूरपश्चिमसहित पूर्वी नेपालका विभिन्न ठाउँमा बाढी र पहिराले निकै ठूलो मानवीय तथा जनधनको क्षति पु¥याएकाले पूर्वी नेपालका क्षति भएका ठाउँसहित सुदूरपश्चिम प्रदेशलाई बाढी–पहिरो सङकटग्रस्त क्षेत्र घोषणा गरिने आश्वासन दिनुभयो ।

सोही क्रममा मन्त्री खाँणले बाढी पहिरामा परी मृत्यु भए प्रति परिवारलाई रु दुई लाख र एक जनाभन्दा बढी गुमाउनेलाई प्रतिमृतक थप रु एक लाखका दरले राहत दिने निर्णय भएको जानकारी दिनुभयो । यस्तै बाढी, पहिरामा परी घाइते भएकाहरूको निःशुल्क उपचार, बाढी, पहिरो प्रभावितको तत्काल खोज, उद्धार, राहतमा ध्यान दिने र बन्द रहेका सडक, विद्युत् र सञ्चारलाई सुरु गर्न उपकरण र जनशक्ति परिचालन गरिने जानकारी दिनुभयो ।

गृहमन्त्री खाँणले सरकारले बाढी, पहिरामा जमिन र घर गुमाएकालाई पनि राहत दिने र पहिराले जमिन नै बगाएकालाई सरकारले नै जग्गा खोजी गरेर दिने जानकारी दिनुभयो । घर निर्माणका लागि हिमाली क्षेत्रमा रु तीन लाख, पहाडमा रु चार लाख र तराईमा रु पाँच लाख सरकारी मापदण्डअनुसारको रकम दिने सरकारले निर्णय गरेको छ ।

भोलि बिहीबार सुदूरपश्चिमको बाढी–पहिरो प्रभावित क्षेत्रको अनुगमन तथा ती क्षेत्रका नागरिकलाई परेका समस्या र तत्काल गर्न सकिने सहयोगको अनुगमनका लागि प्रधानमन्त्री शेरबहादुर देउवा, संस्कृति, पर्यटन तथा नागरिक उड्डयनमन्त्री प्रेमबहादुर आलेसहितको टोली सुदूरपश्चिम जाने तयारी भएको उहाँले जानकारी दिनुभयो ।